捱罵

喺公司嘅責任多左﹐相對捱鬧嘅機會亦多左。一般公司內做錯嘢﹐上司都只會話你兩句﹐依家睇嚟緊張大師嘅緊張質問都變得十分柔和。亦因為實在係自己嘅錯﹐捱鬧都活該。但相對外人就唔會對你咁寬容。而且公司有 policy﹐對外時﹐有錯係全公司嘅錯﹐有功勞係全公司嘅功勞。出錯時對外人指責係某某同事嘅錯﹐只會令人覺得公司內部合作有問題。因此當責任多左﹐對外機會多時﹐就算唔係自己嘅錯﹐都要照樣捱鬧。呢兩個星期就被鬧兩次。兩次都係同事失職﹐而我係後期先接手工程。其中一次甚至根本唔係我自己負責嘅部份。真係被鬧到口啞啞。當我被問及點會咁出錯﹐點解咁唔小心時﹐你叫我點答? 唔係我﹐我又點知點解? 只能承認係我哋失職﹐道歉﹐然後繼續捱罵。繼而想辦法解決問題。當然亦唔能夠鬧翻個同事嚟出氣﹐因為一個生緊仔﹐一個辭左職。就算當事同事喺度﹐都只能好言告之。同頂頭訴苦﹐佢話現實就係咁。而且要知道建築呢行嘅其中一個特點係一個工程做得好﹐所有經手人都有功勞﹐相反一有問題﹐永遠係建築師嘅錯。喺預測未來捱鬧嘅機會越嚟越多之際﹐都要多謝各位上司以往幫我擋嘅咁多刀。