外表純真﹐內裡嚇嚫

上星期五晚係公司嘅聖誕派對﹐但係因為我要帶查經﹐所以無去。今日返到公司﹐同事告之﹐我又攞獎啦。
我都講過﹐我哋公司啲人有幾無聊。今年聖誕派對﹐ 新增設左一項 "Ridgie Award." 名字由來據聞係取其 Partridge Architects 中嘅 Ridge。三星期前就已經有一張有三十幾個項目嘅表格電郵俾每個人﹐然後各人要選舉出每個項目最合資格嘅人。所以簡單講﹐呢個選舉又可以叫做 "公司之最"。之所謂 "之最" 其實都唔係好嘢。好似我咁﹐我就被選為全公司最有可能成為連環殺手嘅人。點解? 無他嘅﹐我平日一副乖乖﹐ 靜靜﹐勤力工作咁嘅樣。初初識我時都以為我係一隻小綿羊﹐但係後來發現原來全公司最鐘意整蠱人個個就係我。其實公司內鐘意整蠱人嘅同事大有人在﹐不過佢哋話我係唔聲唔聲﹐嚇你一驚個種﹐似足啲連環殺手咁話。獎品係玩具斧頭一把。
開會遲到最多嘅係大老細﹐真係眾望所歸。最有可能為小事跳起嘅係緊張大師﹐佢得到鎮靜劑一瓶。講嘢最多嘅同事得到封箱膠紙一卷。最常喺我哋個靚女行政主管間 office 出現嘅同事得到 office map 一張﹐認真底死。重有另外多項得獎人﹐不能盡錄。