景星

我嘅房東決定將物業賣出﹐今日地產商會帶人嚟睇屋。於是尋晚將公寓好好洗擦一翻。唔好失禮人。雖然地產商表示我新簽到下年九月底嘅租約唔會有影響﹐但係租約完結後呢? 將會係未知之數。亦聽過有逼遷事件﹐但願唔會發生。雖然租約重有九個月﹐但如果綠卡未能及時辦成﹐我會於2007年7月回歸。即係話好有可能我需要九月搬一次﹐十個月後又搬一次。可知揾屋同搬遷係一件非常費神嘅事。而且我已經唔係如學生時代般﹐兩件行李﹐10個紙箱就可以走人。諗起搬屋就令人頭痛。一搬再搬就痛上加痛。而且我非常喜歡現時嘅居所﹐當中亦有好多美好嘅回憶。承如 BL 所講﹐重有時間﹐唔好擔心住。我都盡量如此去諗。再者麻煩就麻煩﹐終歸係解決得了嘅事。之但係擔心總會有。半夜朦朦朧朧睡醒﹐突然諗起有幾個地方尚未抹乾淨﹐又突然諗起如果。。。。諗起未知之事﹐諗起有點兒孤獨。。。。睜開眼之際﹐赫然見到一顆超大嘅星星﹐就單單一顆﹐旁邊一片澄清﹐因此以為該星係飛機。因為實在未見過如此大嘅孤星。望左好耐發現原來真係一顆星。突然心裡諗起﹐唔知當年東方嘅博士所見到嘅景星﹐係唔係好似如此這般單一一顆星星喺天? 就係如此一顆景星喺前引路﹐將佢哋帶到耶穌面前。突然又諗起自己早前分享兩次急忙揾屋經歷。一次因為學校系統問題﹐被逼四日內搬走。一次係冧天花﹐又被逼搬遷。但係兩次都靠神安然渡過。今次可以同樣將一切交俾神﹐讓佢作我嘅引路之星。想著﹐想著﹐心裡頓感平安。