臭蛋美人

自從上次幫我隻右腳母趾放膿後﹐已經好到七七八八架啦。點知因為要爬屋頂要著厚底鞋﹐又因連日落雨﹐一拖再拖﹐結果著左四日少少頂趾厚底鞋。右腳母趾原患又開始痛。唔理唔理佢就越嚟越痛。經我多方明查暗訪﹐相信係因為我患左 Onychocryptosis。唔好以為係啲嘜嘢好勁嘅怪病喎﹐講得白少少﹐其實即係腳甲倒生﹐喺啲暗暗嘅邊位插入肉﹐越插越深。於是我走去買左 Dr. Sholls 嘅藥膏﹐環狀軟墊同特製膠布。話說應該七日就好。今日第一次用﹐藥膏擠太多﹐包紮好後﹐有少少喺環狀軟墊邊漏出嚟﹐於是緊係抹走佢啦。抹完後覺得臭臭哋。聞下張紙巾﹐嘩。。。。。好臭呀﹐超臭﹐直頭就係臭蛋個種臭味。於是啦啦聲攞枝香水潤膚膏出嚟﹐搽喺隻腳趾公果度。天呀。。。。即係話喺未來嘅七日﹐ 我將會以臭蛋嘅形像示眾﹐枉我為天下第四美人。形像大損﹐點補救呀?