林獻羔牧師

有謂北方王明道南方林獻羔。王明道牧師就好多人都聽過﹐但係林獻羔牧師就可能唔係太多人識。不過對於大陸年長一輩嘅弟兄姊妹﹐呢個名應該唔會陌生。
話說 1997 年暑假同友人返廣州。巧合地撞左入林獻羔牧師當年位於廣州大馬站嘅開放式地下教會。(聽講因為太張揚﹐林牧師喺幾次被抄家封教會後﹐搬左去另一據點。現今位置不詳。) 我哋遲左五分鐘左右就無位坐﹐要喺通道坐小板凳。個日唔係林牧師講道﹐係個姊妹﹐大概係位女傳道。其實當時我根本都唔知林獻羔係嘜水。散會時﹐有個小老頭走過嚟話自己係呢間教會嘅牧師﹐話未見過我哋﹐不如傾下計﹐交流下咁話。當時想快啲去食飯去玩嘅我哋惋言相拒後走人。及後﹐翻到美國﹐有次同某屬靈長者講開﹐先知原來小老頭唔係邊個﹐就係大名頂頂嘅林獻羔牧師。連美國總統烈根都接見並送左枝筆同聖經俾佢。知道後﹐大嘆走寶。如果當時留低﹐聽下佢講因為信仰入獄 20 年嘅經歷﹐聽下佢講多次被抄家都對神充滿信心嘅見證﹐一定得益良多。