蜻蜓見證

好友蜻蜓﹐相識於雨津。大家讀同一所大學﹐參加同一個團契。
蜻蜓﹐天生殘疾。雙手加起﹐只有四根指頭﹐腳趾亦長不全。父親早年拋妻棄女﹐身為獨女﹐自小兩母女雙依為命。蜻蜓﹐有絕對理由怨天尤人。但十歲接受主嘅佢﹐樂觀開朗。認識超過十載﹐雖然多年未見﹐但每每諗起蜻蜓﹐第一個印象一定係佢嘅笑容。我哋叫佢 the super smiler.
盡管如此﹐蜻蜓亦有佢內心深處嘅一面。佢同我分享過﹐但更令我感恩同欣賞蜻蜓。因為佢嘅軟弱﹐佢好清楚有神去承擔。
十歲信主﹐蜻蜓最希望母親亦得到同一福份。可惜母親不以為然。一開始就反對蜻蜓信主﹐而且唔容許佢受浸。表示如果佢十年後重相信神先讓佢受浸。十年後﹐蜻蜓專程返新加坡受浸。為嘅係要向母親作見證。佢十年未變﹐因為佢所信嘅神係真真實實嘅神。可惜母親依然未為所動。直至兩年前﹐蜻蜓一直為母親能信主﹐禱告十七年。
兩年前嘅年初﹐蜻蜓母親從星州至電﹐申訴失業。蜻蜓心想﹐母親辛勞一生﹐如今失業﹐充滿怨言﹐重點去令佢相信有一神一直保守? 但同時間佢心裡有一種感動﹐覺得神將要作工。
同年二月﹐蜻蜓開始不斷頭痛﹐早晨暈眩。起初無理會﹐直到一個多月後﹐終於喺診斷中發現佢腦裡有兩個腫瘤。然後就係一系列嘅診證。蜻蜓完全唔敢告之其母。四月﹐留院四日﹐甚至喺醫院渡過佢嘅生日。雖然有弟兄姊妹嘅關心﹐但係蜻蜓形容個四日實在係生命嘅底谷。對神嘅感覺﹐如落乾旱無水之地。雖然理性上知道神同在﹐但卻完全無法感受﹐覺得神遙遠得很。幸而最後診斷腫瘤為良性。但其中一個腫瘤則需要不斷觀察。
同時間﹐蜻蜓母親終於起疑心。喺多次詢問後﹐得知真相。因為失業在家﹐所以立即起行赴美三個月。就喺呢段時間﹐蜻蜓母親參加教會辦嘅退修會時﹐心硬嘅佢終於被感動決志信主。
當母親返新加坡時﹐蜻蜓曾擔心母親會否同神疏離。但係喺母親返家不久﹐有次佢高興咁至電蜻蜓。蜻蜓以為何事令母親如此興奮。原來佢想告之蜻蜓佢會背主禱文﹐並立即喺電話中背頌。令蜻蜓當場落淚。
蜻蜓話我知﹐母親依家甚至喺神學院修讀課程﹐實在係在後嘅要在前。蜻蜓同我分享﹐佢相信由佢第一日為母親祈禱﹐神就已經聽到﹐神根本就知道蜻蜓母親會喺十七年後信主。但係點解要等咁耐? 蜻蜓話佢相信神要佢學習祈禱等候。神就係要蜻蜓為母親祈禱十七年﹐學習不斷禱告﹐學習永遠唔放棄。呢個係神操練蜻蜓嘅其中一份功課。原來禱告唔單只為得蒙應允﹐唔單只係同神溝通﹐唔單只係學習聆聽﹐重係學習堅忍等候嘅操練。
重有四個月﹐蜻蜓就會完成佢嘅博士課程。然後前面重有好長嘅路要走。希望大懶蝶可以同蜻蜓一齊飛﹐乘著神恩典嘅風﹐飛得又高又遠。