如廁不祥

公司寫字樓嘅洗手間新裝左 occupancy sensor。但係位置有問題﹐setting 都有問題。新裝嘅 sensor 係 ceiling mount 嘅 motion sensor﹐同教會裝嘅燈制式 occupancy sensor 唔同﹐所以位置裝得唔好就會出問題。
今早正在順應自然嘅呼喚時﹐突然全部燈熄晒。要知道洗手間內無窗﹐而且洗手間同公共走廊間隔左個小玄關。而小玄關嘅燈又同洗手間線路相連﹐一熄全部一齊熄。又因為中間隔左小玄關﹐就連喺門縫穿過嘅走廊嘅光都無法見到。亦即係話﹐當所有燈熄晒時﹐係黑到伸手不見五指嘅。好彩我剛剛好呼喚完畢。而又因為上星期﹐洗手間嘅燈制就已經出現過問題。所以當漆黑一片嘅個一刻﹐無俾佢嚇親。而電光火石間﹐知道一定同新裝嘅 occupancy sensor 有關。所以立即起身﹐向上揮手。然後所有燈又著翻。
不過真係麻煩﹐每次如廁﹐都要向上揮手﹐以確保 occupancy sensor 感應到我嘅存在。而我又可能太矮﹐有時揮手都唔得﹐要跳起揮手。有次飲水太多﹐放水時間長少少﹐短短 30 秒﹐燈熄左兩次。去一次洗手間﹐要跳起揮手兩次。本來諗住聽日帶枝旗入洗手間﹐一面去﹐一面揮旗。不過好彩到左放工時間左右﹐管理處終於有人將 sensor 移位﹐從新安裝。終於可以如廁平安。