印度

除左咖哩牛腩飯之外﹐我對印度一無所知﹐亦無特別印象。但係突然發現﹐我同印度拉上關係。
唔知從幾時開始﹐都唔知點解﹐我無情情收到一個叫 Dr. KP Yohannan 寄嚟嘅電郵﹐講述關於喺亞洲傳福音嘅事宜。每月一個 update。我大概都收左成年幾兩年佢嘅電郵。有時睇下﹐有時見到就刪除。但係就算睇過都從來無為意呢位宣教士喺亞洲邊度工作。
直到助養左 NiNi 後 (其實我都係隨便揀﹐見到佢張相好得意﹐揀左先知佢係印度人) 就對印度呢個字敏感左。今日又收到 Dr. KP Yohannan 嘅電郵﹐突然發現原來佢一直喺印度。真係唔知咁岩定咁轎。 揾日去同陳仔傾下計至得。
Dr. KP Yohannan 講述尋日發生嘅新聞。喺印度嘅福音學校 Gospel for Asia Bible College 俾 500 名反基督教嘅人闖入搗亂﹐有六位學生被打傷﹐其中一位情況嚴重。著我哋為受傷嘅學生禱告﹐更要為果 500 個搗亂份子禱告﹐因為佢哋都需要基督嘅愛。
再一次提醒我喺美國﹐或喺香港嘅基督徒真係太自由幸福哪。而至於好多時我哋都唔希罕﹐覺得理所當然。求神時刻提醒我去感恩﹐好好警醒作工。亦多為受逼迫嘅肢體禱告。