Mission Impossible

失蹤一陣﹐因為近日工作較忙。全公司都忙﹐忙到要退出 Canstruction﹐好失望。而忙之餘﹐我亦有少少壓力。話說唔知幾時開始﹐我兼任埋公司嘅所有平面設計項目。而近日﹐大老細要我做埋展覽設計。要知道展覽設計本身係設計中嘅一項專業﹐而我喺學校雖有做過下﹐但實際未有展覽設計嘅專業訓練。
事件發生經過係我哋公司每年四月底都會有個 marketing party. 而今年為配合我哋新搬社字樓﹐於是場地就會喺新社字樓 (都好懷疑點放得落二百幾人) 。又因為大老細估計新社字樓嘅設計有極大可能取得 LEED 嘅金獎。就算無 金都一定有銀。於是著我喺原來嘅接待處紅牆上設計一個關於 LEED 同我哋公司嘅綠色設計展覽。但係問題在於紅牆本身 (一面突出幾寸嘅大面積鮮紅色牆﹐上面有射燈)就係一幅藝術品。無理由再喺藝術品上面掛嘢架。而我哋一眾支持 KISS (Keep It Simple, Stupid) 呢個設計原則嘅同事﹐包括我在內﹐都反對呢個工程。其中反對最甚嘅當然就係原本設計紅牆嘅同事。但係大老細今次非常堅持。我作為設計師﹐覺得自己好似漢奷一樣。我知道無論我設計嘜嘢都唔會討好。再者連我自己本身都認為點做都唔會及原本好﹐但偏偏就要硬住頭皮上。而喺整個設計過程中﹐大老細都唔係點理。只有同我同為漢奷嘅 marketing manager 負責文字上同連絡物料加工廠商﹐另外一位負責 LEED 嘅技術性問題嘅外援之外﹐就真係得我一個人設計呢個我原本就唔熟行 (對展覽設計同 LEED 都唔熟行) 嘅工程。而過程中重聽到反對嘅聲音﹐例如 "唔係呀? 你認真架?"﹐如 "我唔係對花蝴蝶無信心﹐而係根本呢個工程就有問題。"﹐ 如"你要知道有意見嘅唔只我。" 唉。就算我話 "我會做好呢份工。" 我自己都無信心。要做一件全世界包括自己都唔睇好嘅工程﹐而又明知無論點做都唔會及原來好。而又有從上下壓嘅責任﹐時間又唔足夠 (我同時間重有幾項其他建築工程要做) 感覺真係幾困難。
終於今日戰戰驚驚 present 左設計嘅 rendering。反對最力嘅同事話 "要知道我依然認為唔應該喺紅牆上做任何嘢。但我要承認我非常驚訝﹐因為無諗過原來無可能做得好嘅工程都可以有好嘅設計。" 大老細表示滿意。Manager 謂花蝴蝶從來無令佢失望過。大家俾左唔同嘅意見﹐但基本設計已經通過。真係舒一口氣。雖然只係過左高層個關﹐我相信其他同事重會有好多意見﹐而我都重係認同唔應該係紅牆加嘢。但至少感覺好多哪。
繼續相信﹐我靠著那加給我力量的﹐凡事都能作。