歸來吧!

之前講過﹐其中一位 project manager 放假﹐我要做代班。我依家最想同佢講嘅說話係 "你歸來吧!"
我終於明白點解緊張大師會咁緊張。我終於明白點解我個前度 PM 會成日鬧人。我終於明白點解兩位新晉 PM 會笑容遞減﹐愁容加增。我終於明白點解佢哋要星期六﹐日返工。我終於明白佢哋做夾心餅嘅壓力。同時我更加佩服我頂頭嘅淡定。果然有經驗就係有經驗。
以前天塌落嚟有 PM 頂住﹐我從來唔洗做前線勇士。依家雖然上面重有大老細﹐但係大老細頂得住間公司﹐頂唔住我。因為個 project 唔係佢嘅﹐有好多細節佢唔清楚﹐我可以問佢意見﹐又可以請教我頂頭。但係我嘅 project﹐頂頭唔再頂得住我﹐最終做決策嘅都係我。而我最怕做決策。偏偏一日電話電郵不斷﹐剛剛解決一樣﹐想坐底做下其他嘢 (我同時都跟緊另外嘅 PM 做緊另外嘅 projects) ﹐電話又響﹐電郵又到﹐又一個 site issue 要解決。Site issue 尚好﹐最怕係人嘅 issue。有日直腸直肚嘅判頭得罪左敏感嘅廠商。廠商向我投訴﹐我只有婉言作和事。呢啲本來唔需要我理嘅嘢﹐突然臨頭﹐真係有啲無措。正如靚靚所講﹐真係好懷念有頂頭照住﹐輕輕鬆鬆做 project architect 嘅日子。好彩代理其間尚未出現錢銀問題﹐事關錢銀投標又係我一大死穴。每次開 construction meeting, 對住一班大男人﹐我就怕。最怕問我啲我唔識答嘅技術性問題。以前開 construction meeting, 我有一半時間發白日夢﹐依家金睛火眼﹐聽漏一個字都唔敢。再落去我一定會老快十年﹐變成 25 歲。
你返嚟啦!