回歸前傳

就由抵港前嘅三十二小時開始講起啦。
一輪衝鋒陷陣。多謝慳啲﹐香蕉蘋果橙同阿魏晶幫我運走最後一派貨。同魏晶食完費城嘅最後晚餐﹐繼續收拾。一夜未眠﹐終於喺五點半一切就緒。多謝各方好友嘅電話短訊﹐喺我最後關機前聽聽美國嘅聲音。
五點半。餵蚊準時到達。但係我卻失預算。當餵蚊將我所有行李﹐連同大大小小十幾袋要分派眾人嘅遺物放好再交埋門鍉後﹐已經差唔多六點。重要喺機場入口微微塞車。
六點四。先開始排隊。機場內一片混亂。幾十萬條隊﹐加上人來人往嘅人潮﹐根本無法分清各條隊嘅龍尾何在。然後又俾人點我排左條錯嘅隊。幸而十分鐘後﹐我覺得唔對路﹐再問人先排翻岩。眼見水蛇春咁長嘅龍﹐心裡開始慌張。
八點嘅機。
七點四。終於排到我。明知行李過磅。早就攞定信用卡出嚟付罰款。點知其中一件因超過七十磅﹐以為俾罰款就得﹐原來佢話唔準上機。結果要將過重行李內嘅嘢轉到較輕嘅行李內。但係較輕嘅行李亦較細﹐本已逼爆。唔理哪﹐當場喺人潮中打開行李﹐將最細又最重嘅幾件物件移位。但無論我如何努力﹐就係無法將行李拉鏈拉上。
七點半。明知一定上唔到機﹐反而定落嚟﹐一面祈禱﹐心中一面盤算打電話俾魚木﹐拜托佢接我﹐然後可以喺魚木﹐魚絲屋企住一晚。第二日 waiting list 睇下上唔上到機。上唔到﹐第三日﹐第四日﹐無了期﹐咁我咪唔洗走囉。
如意算盤正打得響噹噹﹐大概神憐憫魚木﹐魚絲﹐拉鏈終於拉上。點知攞住我護照機票個位地勤人員居然唔見左。於是我死扯住一位UA工作人員問。佢話佢都唔知﹐叫我自己揾。於是我又扯住另一位﹐終於辦完 check-in。
七點八。你猜佢同我講嘜嘢? 你去個邊排隊等叫名哪﹐等攞翻你張機票護照哪。排隊等叫名??? 我話我班機喺八點喎。佢話好快架哪。於是死死地氣又去排隊。突然有人問邊個係八點 UA709 班機嘅。我即刻舉手。於是排到第二個。本來排我前面嘅人開始鼓嘈﹐一個話佢班機八點三﹐一個話佢班機八點半。我唔理哪﹐係地勤叫我排第二嘅。
七點九。排第一嘅喺一對夫婦。個太太唔知走左去邊。地勤問個丈夫問題﹐問極佢都聽唔明。我好想話不如我幫你翻譯呀。正想上前﹐個太太終於出現。但係無好幾多。一樣唔係聽得好明﹐但問兩三次都終於搞惦。終於到我。
七點十。飛跑入閘。但保安檢查又一長龍。幸而原來有一批 709 班機嘅全部遲到﹐因此有一條隊專開俾我哋。個心定好多。
七點十一。我重要比人抽樣查行李。但佢睇過我張機票﹐相信喺夠時間。
八點正。跑到入機處。剛剛好聽到宣佈﹐班機已經到左好耐﹐但清潔人員重喺度清理緊機倉。重未可以登機。
哦。好呀。你慢慢哪。
終於順利登機。
從來都好保險﹐未試過咁失策。幸而最後都上到機﹐就算係個教訓。以後要謹慎多啲。