豬頭紋

見 BL 講男士風度﹐等我又講埋一份。其實有一日我都好想寫﹐不過後來唔記得。如 BL 話齋﹐喺美國習慣見有風度嘅男士﹐喺香港就唔可以要求咁高。想寫嘅個日當然唔係空穴來風。喺美國大家都習慣入門後順便幫後面嘅人開住個門。當日到大家樂﹐前面位男士已當我無到﹐我喺佢後面三尺唔到嘅位﹐佢一入門就放手。唔緊要﹐可能佢睇唔到我。拉翻開快要關上嘅門﹐就喺呢個時候﹐後面位男士居然喺我拉開門之際﹐從後超越我﹐過門而入。真係咁趕時間? 定係我動作慢? 定係我拉開門嘅姿勢似迎賓小姐?
至於搭電梯﹐回歸咁耐﹐記憶中唯一兩位明意識入電梯叫我先行嘅男士﹐一位係我姐夫。見過好多搶閘男子﹐其他人可能都有 ladies first 嘅意識﹐但係一般都係第一秒見你唔行佢就行。唔會好似美國人咁﹐伸埋手﹐擺明讓你。另外一位就係十一樓嘅小弟弟。電光火石間﹐心想愚子可教也。原來男子有風度真係立竿見影。
不過話得說回來﹐喺美國﹐風度表現多少都有地區性。話說我喺俄記讀書時﹐只要我手上攞嘅圖超過三尺﹐街上一定有男士問我需唔需要幫忙。但係當我喺賓大開學無耐﹐因為貪平﹐幾位同學都買廁所門改裝作圖板。於是某日﹐我攞住托同學幫我買嘅兩尺六乘七尺嘅廁所門﹐由建築學院行去木工工場。途經五條街。人來人往嘅街上﹐只見避開嘅人﹐無人過問一聲需唔需要幫忙。不過都難怪嘅﹐一個五尺半寸嘅瘦小身軀﹐攞住隻七尺嘅廁所門。大概街上行人見到嘅只係一隻會自己行嘅廁所門﹐緊係避得就避啦。
大概時代唔同﹐往日女士口中嘅豬頭紋係會讓女士先行﹐幫女士攞重物﹐幫女士開門﹐開車門﹐拉椅﹐甚至喺女士入座時起立。後面嘅幾樣可能已經要求太高。原來就算我喺問完要唔要幫忙後多數都會答唔洗都好﹐我依然認為﹐男士係應該有意識去幫女士負重嘅。當我慨嘆喺香港豬頭紋面臨絕種嘅邊緣時﹐我再次意識到﹐雖然我比較鐘意男女平等﹐但其實潛意識內我仍相信男女永遠唔會平等。