歷盡變遷

點解我用親啲嘢都成日執笠﹐又或者被人收購架呢?
首先講下洗頭水。初到美國﹐發現 salon selectives 非常岩我用。後來 salon selectives 嘅產品越嚟越少﹐至終失埋蹤。大概執左笠掛。無奈﹐改用另一品牌。都唔錯。但唔好問我係邊個牌子﹐我唔係好記得。因為當我轉用唔夠半年﹐佢又執埋笠。於是再轉另一品牌。後來發現佢嘅產品又越嚟越少。一個月後發現原來只不過係轉包裝再推出。幸好。如果被啲迷信嘅三姑六婆知道﹐一定會話我剋洗頭水。
手提電話服務一直用 AT&T。後來 AT&T 被 Cingular 收購。我只係想轉 monthly plan 就被逼轉去 Cingular﹐簽新 contract﹐因為當時 AT&T 已經唔存在哪。結果回歸時用唔夠兩年﹐因此要毀約交罰款。但係就喺呢個時候﹐AT&T 又出見翻。我問佢咁依家到底係 AT&T 定係 Cingular 呀。服務小姐用好引以為榮嘅聲線話, Oh, we're now called the NEW AT&T. 就係因為咁轉嚟轉去﹐我俾左 US$175 罰款。
由俄記開始我就用 MBNA 嘅信用卡。年前 MBNA 被 Bank of America 收購。幸而我不受影響。回歸後準備順利轉到 Bank of America 亞州分行。為安全起見﹐我喺美國時﹐分別用電郵﹐電話詢問﹐甚至行過 Bank of America 時﹐順便親身再問。得出一至嘅答案。非常簡單﹐只要你去任何 Bank of America 亞州分行轉地址就得哪。所有客戶資料會轉到香港。於是我放心去辦。點知。。。bank of America 亞州分行已經被完全收購﹐並改名為中國建設銀行。咁老土?!! 腦裡面即時想起 "為建設新中國共同奮斗﹐實現共產主義堅持革命" 嘅偉大口號。中國建設銀行就中國建設銀行哪。點知服務員同我講中國建設銀行已經唔提供 BA 嘅信用卡服務哪﹐只維持 ATM 服務。既然如此﹐唯有回歸我嘅舊相好﹐匯合豐收啦。