回憶

收拾繼續進行中。發現好多遺忘多時嘅古跡。有暑期工上司幫我攞嘅 Kevin Costner 親筆簽名照﹐為醫管局畫嘅漫畫 (亦係我人生中第一次被印刷出版嘅作品)﹐十五年前問老師借左唔記得還嘅書﹐同表妹扮民初反革命女學生嘅黑白照﹐中五嘅週記﹐中四嘅文件夾﹐芭蕾舞鞋三對﹐小學嘅紀念冊﹐兒時玩嘅串珠仔。。。。好多都喺愛與痛之間﹐被放逐到垃圾桶內。但拋捨嘅同時亦拾回太多嘅記憶。