我會做好呢份工

大概上年嘅呢個時候﹐曾與美國公司嘅 Office Director 談天。講到當時仍在享受半退休狀態而感到有點兒內疚嘅心情。Director 話無須內疚﹐因為我已辛苦良久﹐要勤力要捱嘅話﹐以後重有三十年時間。
果然﹐新工上任一週﹐已經有欲哭之感。
首先﹐第一日上班﹐第一次踏進新公司辦工室 (面試時只見會議室﹐而辦工室與會議室分隔於前門左與右)。門一開﹐驚覺不見天日嘅日子將要來臨。 全公司 12 人﹐一對夫妻檔老闆老闆娘當然坐房﹐而其餘 10 人連同一眾書櫃文件機器則擠擁於一間600尺左右無窗嘅辦工室。我嘅位置只有 4 尺 X 5尺。檯面檯底擠滿公司物件﹐連放腳位置亦無。亦無任何櫃桶放私人物件。我嘅 4X5位置包括左面 2尺 X 3尺嘅三桶櫃﹐櫃裡櫃外全放滿公司文件文具。而我嘅電腦竟係舊式 17 寸大頭盔 monitor。右手邊亦放滿雜物。我與另外兩位同事排排坐一張 12 尺檯。亦即我通共只有坐位﹐keyboard 位﹐同右手邊1 尺左右嘅空間。畫圖睇圖時要縮埋一角﹐唔能夠將整張圖攤開。全公司男女共用一格廁所﹐因為另一格已用作雜物房(全層只有兩格廁所﹐唔係兩個﹐係兩格)。最妙嘅係除卻老闆老闆娘﹐全公司只有兩部電腦有接駁電郵﹐我嘅電腦係其中一部。亦即係話﹐其他同事要寄或要收電郵時﹐一定要用我或另一位同事嘅電腦。所以我做做下野要停低﹐比其他同事用。
雖然如此﹐環境卻唔係讓我為難嘅原因。第一個早上﹐老闆已鬧人兩次。中午同新同事午膳﹐大家講開﹐原來老闆日日鬧人。眾同事謂鬧鬧下就慣哪。果然﹐我做五日﹐見佢鬧人鬧足五日。大概我新工上任﹐尚未被罵﹐甚至重被讚一次。不過我已作心理準備﹐將要被罵渡日。事關根據我觀察與同事證實﹐老闆一唔鐘意就鬧。唔理你有理無理﹐佢鬧左你先﹐最後發現原來係佢自己錯﹐唔會道歉﹐會鬧你第二樣野。老闆娘尚好﹐但據聞亦有小姐脾氣。不過根據連日觀察﹐佢被老闆﹐亦即佢老公鬧多過佢鬧人。
重未講完﹐公司非常無系統。大概因為無內部電郵系統﹐開會永遠作最後通知。星期二早上開會﹐星期一晚先叫人趕圖﹐一眾同事做到凌晨兩點。幸而我當日第一日上班﹐七點幾就鬆人。但難逃一劫﹐星期四要我去澳門開會﹐星期三晚七點幾先話我知。星期四開完會返到香港晚上九點﹐老闆要第二日早上九點有野比佢睇﹐於是我哋又做到一點﹐之前一晚已經做到兩點。星期五 晚8 點半偷走﹐攞埋啲圖返屋企星期六﹐日再做。今晚實在想休息﹐團契都無返。下星期三出圖﹐預計星期一﹐二晚無兩三點唔洗旨意放工。
天﹐我已想辭職。同事證實此公司流動非常大﹐大部份同事都做唔長。難怪我未開始揾工但經常上香港建築師學會網站八掛時﹐見呢間公司幾次大量聘員﹐卻來來去去只得 11﹐ 12人。雖然如此﹐仍深信此乃神賜予嘅工作﹐事關上任前多次禱告與驗證中證明主為我開路。到底神要我學習何事﹐要全然依靠或另有學習? 每每想到此乃神安排就會多添平安。雖然非常唔鐘意﹐但唔算太唔開心。大概被罵時會作別論。但至少我有工作﹐至少同事間相處融洽。最重要知道神在看顧。我會盡我能力﹐直至我當真無能為力。