主日崇拜

天上千萬天使天軍圍繞主前敬拜﹐而地上嘅敬拜係。。。。
今個禮拜日又輪到我喺主日崇拜領詩。今次係我嘅第三次﹐所以依然非常緊張。而結果今個主日嘅敬拜係。。。。別開新面嘅。
事前準備算足夠﹐但實在有太多意想不到嘅情況。。。。
一嚟就出事。本來牧師﹐主席同領詩應該喺風琴響起時﹐由後面行上前。牧師入座﹐主席同領詩上臺。但係風琴響起時﹐我重喺最前講緊 powerpoint 次序﹐ 見主席已經行到前面﹐喺隔離我先哪哪聲跟住企起身﹐好彩跟到。
唱詩唱到最尾﹐本來講好牧師會喺第三首詩最後一次副歌就開始上臺﹐點知喺臺上望落去﹐見牧師唱得太陶醉﹐眼都合埋﹐睇唔到我向佢打手勢。於是示意 BL 過去叫佢。好彩到最尾一句﹐牧師突然睜開眼。不過我喺臺上一定做左好多奇怪表情同手勢。
做詩琴嘅亞 Camp 彈彈下突然份譜飄左落嚟﹐佢一手接住﹐嚟唔切放翻上琴架﹐於是佢放喺大腿繼續彈。個樣十足似比人罰抄咁。
聖餐時﹐牧師心血來潮﹐叫李老闆唱詩。但係李老闆係聖餐襄禮。於是叫我代佢。嗄﹐但係我唔係執事﹐唔做得聖餐襄禮喎。不過一切發生得太快﹐又係喺臺上﹐無得商量。好彩臨尾另一執事攪惦左。
回應詩﹐本來唱第一節。點知亞 Camp 唔記得左。彈完第一節重繼續彈。風琴完全唔知嘜事﹐撞晒音。BL 醒目﹐立即將 slide 轉去第一節開頭。正當我都諗住叫大家再唱一次時。亞 Camp 突然醒起彈多左。又有見及風琴已經亂晒﹐彈唔到落去﹐佢突然停左係度﹐一手揞住個嘴忍笑﹐一手舉起講句唔好意思。李老闆第一個忍唔住笑。我見佢哋咁攪笑﹐唔記得左自己喺臺上﹐大笑一聲。
牧師見狀﹐一定嚇到滴汗。可能嚇得太犀利﹐佢自己都亂埋。祝完福﹐我哋唱完阿們頌﹐佢又再出嚟祝福多次。企喺隔離嘅我諗緊唔知係唔係要唱多次阿們頌﹐會唔會唱完牧師又出嚟祝福多次。好彩主席立即上前宣報聚會到此。
於是一個別開新面嘅國慶周崇拜就喺笑聲同驚嚇中結束。