女皇萬歲

幫 City of Philadelphia District Attorney 設計佢哋個新辦工大樓咁耐﹐今日終於見到呢位聞其名已久嘅最高大律師亞伯拉罕女士。本來以為佢非常難侍候﹐事緣當初設計佢辦工室個私人洗手間時﹐佢指明所有用具均要瓷製。漱口盅﹐肥皂碟就容易。但係廁紙架﹐毛巾架諸如此類﹐依家已經出晒不銹鋼或鋁製品﹐瓷製實在難揾。但係佢話一切金屬嘅長形管狀物體都唔能夠喺佢嘅辦工室出現﹐因為會令佢聯想到監獄鐵窗咁話。今日相見﹐誰知原來佢都相當幽默﹐平易近人。不過一直支持男女平等嘅我今日倒係有一新發現。City of Philadelphia 派嚟同我哋接洽嘅都係比較高級嘅識員﹐因此隱隱中亦總透出一種威嚴。但係一企喺亞伯拉罕女士旁邊﹐雖然佢哋表現同平日無異﹐但感覺上好似就突然變成一群圍住女皇轉嘅跟班。猶其當佢哋研究緊傢俱點放時﹐大律師突然講左句 "我哋係唔係應該有多啲女人?" 唔知在場各男士有無當場滴汗呢? 唔知點解突然覺得一群男下屬圍住一位女上司會比我一種怪怪嘅感覺架呢?