費城皇帝

一般我都係行路放工。但係為左安全起見﹐九點半過後就會搭巴士﹐而十一點後就會搭的士。之不過尋晚發現﹐原來搭巴士都未必比行路安全。話說尋晚放工﹐岩岩好趕上42號巴士。一上車就見一已過中年嘅潽洱膚色男子喺最前排對正前門嘅座位度一面聽耳筒﹐一面大唱特唱。你知咁嘅情況﹐喺費城真係見慣不怪。於是一於好少理﹐如常行去我嘅常座。坐低一陣﹐就覺得有少少唔妥。終於發現原來唔妥嘅係阿潽洱唱嘅歌詞。佢一定係位唱作歌手。看官請睇以下歌詞。。。
XXXX XXX (粗口) Chinese..... XXXXXXX Japanese....... XXXXXXX American Chinese XXXX.... XXXX..... XXXX XXX, ching ching chong chong....... hahaha ( 中間夾雜佢不受控制嘅興奮笑聲) XXXX......
歌詞重重復復就係個幾句。後來我又發現原來喺我斜前方﹐坐左位類似日本藉嘅男子。同我一樣﹐一於扮鎮定。當時最後面重有另一位乘客。因為我住 2 街﹐所以一般嚟講﹐我都會係最後一個落車。但係尋晚我真係唔敢留到最後。雖然話重有阿司機大佬。日本藉男子落車後﹐阿潽洱突然企起身﹐向後面行過嚟﹐但係行左一半﹐突然雙手抱柱﹐聞歌起舞﹐越跳越興奮﹐ 越唱越大聲﹐重不斷指住我。終於見最後排乘客落車﹐我都跟埋一齊落。不過好彩只係早左一個站。
嗄﹐ 唔知阿潽洱佢會唔會喺 Penns Landing 總站落車後﹐ 順便喺條橋度學阿九龍皇帝咁題翻啲字咁呢?