始終如一

尋晚同班姊妹慶祝娜娜同安子生日。席間莫名諗起喺俄記嘅建築系師兄。佢亦係當年學生團契團長。多年無聯絡﹐突然諗起嘅係佢小兒子嘅故事。
師嫂因為有遺傳病﹐婚前著師兄驗血﹐果真證明佢哋嘅下一代將會帶著遺傳病出生﹐而且夭折率之高令佢哋早已打消生育念頭。
兩年半前﹐奇蹟般﹐小余一出生。令我納悶嘅係文學修養頗高嘅師兄﹐何以改名如此慳水慳力? 直至我從佢哋嘅網頁得知整個緣由。。。
原來呢個名早已改好。甚至係喺師兄師嫂早決定唔生育嘅時候。明知唔會有下一代﹐幫小孩改名﹐只係兩人喺長途車中嘅遊戲。余一嘅英文名係 Alpha, 而 middle name 係 Omega. 全名 Alpha Omega Yu Yat. 翻出嚟就係"始終如一"。無論環境如何﹐神對我哋嘅愛始終如一。 呢個就係小余一名字嘅意思。
今早﹐心血來潮﹐再到佢哋嘅網站瀏覽。發現原來小余一嘅細佬喺上年出生。一對本來以為無可能作父母嘅夫妻﹐卻擁有兩個健康嘅兒子。
原來就算環境已證明完全不利﹐但憑藉神始終如一嘅愛﹐絕對無難成嘅事。