金蘭表妹

我呢個金蘭表妹﹐雖然自細玩到大﹐但因為地理因素﹐聚少離多。小時唔懂得珍惜﹐偶或有吵鬧。幸後來年齡日長﹐感情越深。少女時期﹐分享過唔少情懷之事。樂與憂﹐總會第一時間寫信告之。年多前回家﹐因為遷居之固﹐母親將我嘅私人物件全數入箱﹐囑我決定邊箱可以保留﹐邊箱可以扔掉﹐以騰出空間。整理工序比預期為長﹐因為其中一箱舊日信件﹐差唔多每封我都細細重讀。而表妹來信之多﹐更為榜首之列。不知不覺間﹐已經數千個日子。過往嘅點滴﹐雖無驚濤駭浪﹐ 但總可以喺漣漪間細味﹐原來我哋係咁走過年青嘅歲月。
以前曾同表妹相約﹐有一日﹐我哋要遣走我哋嘅另一半﹐就我哋兩姊妹共渡一日﹐一齊再分享以往嘅信件。我哋可以將信件交換﹐重讀自己所寫嘅。將以往多年嘅快樂同掙 扎﹐連同我倆嘅感情﹐再重溫一次。記得講呢翻說話嘅時候﹐我哋都正在計劃各自嘅婚禮。然而﹐未己﹐我嘅未婚夫離我而去。但好慶幸表妹如期成為新婦。
今早﹐表妹告之佢將喺年底成為母親。乍聽消息嘅喜悅﹐實在難以形容。感受就如同我自己懷孕一樣。恨不得飛到表妹身邊俾佢一個大大嘅擁抱。著實高興得雙眼潮濕。內心突然充滿一份柔情﹐好想好想﹐好想寫一篇關於表妹嘅文章。
表妹懷孕期間﹐正夕表妹夫出差之時。 未來一段日子﹐一星期只能見面一次。為此﹐相信表妹夫比表妹更著急無奈。但表妹請記得﹐你身邊重有好多隨時隨地守候你嘅人。我雖身在遠方﹐但我嘅支持同禱告﹐必無時無刻相伴。