郵政風雲

每次去郵局都會等白了少年頭。今次亦不例外。有見先例﹐於是等到兩點先去。結果其人山人海有多無減。一定係人人都自以為醒目﹐人人都兩點去郵局以為避過正午人潮﹐結果攪到兩點人潮更多。
等待中﹐如常無無聊聊四處張望。見到一張比我更無聊嘅海報。其實海報內容非常正常﹐係郵局嘅收費表。圖文並茂。但細心睇會發現海報右下角有一個好細嘅圖表﹐寫住 UP﹐旁邊有剪嘴向上﹐隔嚟寫住 DOWN﹐旁邊有剪嘴向下。好明顯係怕掛海報嘅人將海報倒轉嚟掛。但係我又唔明﹐海報又唔係抽象畫﹐而係有大量文字﹐掛海報嘅人應該知邊面上﹐邊面下。再想﹐會唔會係怕掛海報嘅人唔識英文? 例如不諳中文嘅人就會將一張中文海報掛反。但係如果唔識英文﹐就連 UP 同 DOWN 都唔識睇啦﹐咁剪嘴圖表作用又何在? 唔明。
好哪﹐終於輪到我。嘩﹐海外收費奇貴。於是照例用信用卡。結果依本辦事嘅職員要睇我嘅身份證。一般其他地方只睇一睇個名同相就算。點知佢好嚴緊地睇晒所有資料。咁當然過份嘅我就被發現張身份證已過期多時。事關我唔揸車﹐本來唔係事必要 PA 身份證﹐而唔係公民嘅我﹐每次辦身份證都要一大堆資料。而 Penndot 辦工時間又短﹐效率又慢﹐於是我一直都無去續期。於是郵局職員以無身份證明文件為由﹐拒收我嘅信用卡。好彩打開銀包﹐千年難得一見﹐有足夠現金。
寄左包果﹐正要行出郵局先想起剛才嚇一嚇﹐唔記得買一仙郵票。於是用自動郵票販賣機。入左錢先發現所有一仙同兩仙嘅郵票均售馨。想將錢按出﹐發現部機居然無退款嘅按扭。揾職員? 天黑都未攪得惦。算數? 我又唔甘心。好彩出現另一位又要買郵票嘅人士。同佢解釋過後﹐我地作個小交易﹐攪惦。
咁我重買唔買一仙郵票? 回頭望望水蛇春咁長嘅人龍﹐我開始攪唔清到底係大家以為兩點少人﹐齊齊兩點到郵局﹐定係郵費加價﹐出現一兩仙郵票擠提。想想﹐都係聽日正午再嚟。