Harry Potter and the Flower Butterfly

從一開始我就對 Harry Potter 嘅電影同書無嘜興趣。首先因為唔鐘意聽(其實係聽唔明嘅籍口)英國口音嘅英文。然後係覺得一班細路走去學魔法然後互相鬥法嘅故事好無聊。所以一直對瘋魔大眾嘅 Harry Potter series 不聞不問。直至。。。
都係智能身份證嘅錯。唔係﹐應該係人民入境事務處嘅錯﹐亦即係香港政府嘅錯。喺入境事務處門口放個引導人潮去書展嘅牌。於是申請完智能身份證後﹐無論小聲音點勸我唔好向果個方向走﹐會逼死﹐又會買書買到窮死都好﹐書嘅呼聲令雙腳不受使喚地跟住一大片人潮走。四個小時後﹐發現銀包所剩無幾先至逃離現場。但係手上已多左兩大包戰利品。其中包括 Harry Potter 全套。(在此一定要一提﹐我終於買左"一紙通"。比 AFC 同角聲平成倍。不過一減再減嘅"團契人生"都唔夠喺 CCC&C 買咁平)
回歸正題。
由 Harry Potter and the Philosopher's Stone 一直到 Harry Potter and the Goblet of Fire﹐一星期就睇完。咁落去唔係辦法﹐一定要慢落嚟做下其他嘢。依加睇緊最後一本 Harry Potter and the Deathly Hallows。我終於明白點解 Harry Potter series 咁受歡迎。
原來唔係單單只一班細路走去學魔法然後互相鬥法嘅故事咁簡單。除左情節緊張﹐當中重充滿人性﹐充滿作者嘅人生觀以及自身經歷嘅反影。於是令我好有興趣去知多啲作者嘅生平。其中問及作者相唔相信魔法。佢嘅答案係 I believe in God, not magic...... I believe in other kinds of magic, the magic of the imagination for example and love.....
事實上書中多次提到愛嘅魔力。主角 Harry 無信心以小小年紀可以打敗惡勢力。鐘愛佢嘅校長 Prof. Dumbledore 一再提醒 Harry 佢擁有大魔頭 Voldemort 所無嘅力量﹐就係愛﹐包括親情﹐友情間嘅愛。
書中嘅人物充滿人性。主角唔係最溫柔﹐最美好嘅。而係會有自私﹐自卑﹐妒忌﹐驕傲﹐好勝嘅時候。好似睇我自己一樣。可幸每次佢哋都會喺經歷中得到教訓而有所學習。
而書中各色各樣嘅魔法﹐當睇深入一啲﹐不難睇出作者嘅人生觀及社會觀。其中三樣 unforgivable curses; imperio, crucio, avada kedavra 分別代表作者對操控﹐虐待同謀殺嘅愆責。而我最有興趣嘅係 the patronus charm。係用嚟對付 Dementors 嘅。Dementors 係看守 Azkaban 嘅一種生物。當佢接近人嘅時候﹐佢會將人嘅快樂攞走。被 Dementors 接近嘅人會覺得冷﹐一切變得黑暗。而且腦裡不斷重演過往最痛苦嘅經歷﹐因而覺得人生再無希望可言﹐覺得以後永遠唔會再快樂起嚟。作者 J.K. Rowling 喺訪問中稱 the Dementor's effect 為 depression。因為佢曾經經歷過。其實有一段日子我都有過個種覺得以後永遠唔會再快樂起嚟嘅感覺。所以完全能感受書中嘅 Dementor's effect。喺 Harry Potter and the prisoner of Azkaban 中 Prof. Lupin 教 Harry 用 the patronus charm 去驅走 Dementors。要使出 patronus charm 最重要嘅係著眼快樂嘅事情﹐集合快樂同希望﹐令魔法棒發放銀色半透明嘅火花驅走 Dementors。但好多時 Harry 明知 patronus charm 嘅道理﹐但每每面對 Dementors 攻擊嘅時候就會落入失望中。但經過多次練習後﹐終於揾到竅門。令我記起自己喺 CCEF 嘅時候。Counselor 要我練習每當沮喪﹐負面思想來襲時去選擇快樂﹐選擇感恩﹐選擇禱告。佢話錯嘅唔係有負面思想。錯嘅係自己選擇讓自己落入沮喪當中。理論好簡單﹐但係實在需要好多練習同恩典。但事實證明呢個唔係理論﹐而係可以真正實行架。因為我有成功過。但係就唔係次次得。我嘅 patronus charm 唔係單單記住快樂嘅事﹐而係同時喺禱告中記住神嘅大能﹐神嘅恩典。但依然要自己選擇要唔要去禱告﹐要唔要 u-turn, go against 當時情感嘅驅使。定係就讓自己舒舒服服去享受難過﹐嘜嘢都唔使做﹐就只要自怨自哎。The patronus charm, 仍在練習中。