明年今日

上年今天下午四時許﹐踏進香港﹐當時想﹐明年今日﹐不知如何。今天﹐正正就係當時嘅 "明年今日"。一年﹐如飛而過﹐到底一切如何?
教會﹐大概已安頓於恩福。感恩﹐慢慢開始與自己小組熟絡。聽聞新人組五個小組中﹐只有我哋小組關係最接近。本來計劃下星期六結伴上深圳逛書城﹐食火窩。然後中秋節去長洲宿營。可惜恩福會規極嚴﹐新人組EBS九個月嘅課程期間﹐以保障組員私人安全為由﹐不准交換電話﹐不准出遊。我哋小組早已犯晒規﹐交換晒電話電郵。但因深圳一日遊嘅計劃被導師知道而被警告﹐唯有擱置。但我哋仍會偷偷通電話彼此分享鼓勵。今日全組考試合格﹐可以升上第二個 EBS 課程。通過三個 EBS 考試後先可以解禁﹐但我哋早已計劃定解禁後嘅聖誕節目。
工作﹐現今全職做機場工程。平常往中環上班﹐但亦常 work from home。然而喺公司上班時間更高興。事緣全公司同事均為基督徒﹐而且變態程度同我旗鼓相當。開開心心又一日。不過機場工程完結後將會另覓新工。
感情﹐過去已過去。正享受自由身。一切仍交主手中。
友誼﹐感謝神讓我認識一班新朋友。有冰友﹐教友﹐其他教會嘅朋友如灣浸嘅姊妹I﹐ 北宣嘅姊妹C﹐重有新同事。
講開冰友﹐不能不提臨老入冰場。真真非常感謝神俾我如此機會。非常珍惜。除卻一班玩得嘅冰友﹐重有個好嘅教練。
Ministry 方面﹐雖然喺恩福未能事奉﹐但卻感恩有烏干達嘅短宣機會。重可以探望 Lhaki 同 Achim。
回想前一段日子嘅迷茫失落﹐終於順利過渡。如今可以用自身經歷鼓勵過渡中嘅姊妹。加油﹐你哋絕不孤單﹐亦絕對唔係你哋無用﹐而係此乃必經階段﹐人之常情。繼續禱告。
而未來日子﹐風雨無定﹐我亦要常喺禱告中讓神帶領。