Batman-The Dark Knight

今日乘入機場工作之便﹐順便喺機場戲院睇埋戲。因為有職員證﹐門票只需 $45。整個戲院只有十個觀眾左右﹐視野完全無阻。極之正。
今日睇左蝙蝠俠。因為各方皆有好評﹐所以期望相當高。雖然套戲整體嚟講不俗﹐但卻令我感到不安。可能因為前一晚夢見自己塊面穿左個窿﹐又可能近日睇得多赫人新聞﹐亦可能恐怕以色列會以武力對付伊朗後伊朗採取報復行動令世界大亂﹐總之成場戲令我感到不安﹐有一種 dark feeling, 又覺得有相當真實度﹐唯恐世上當真有如此瘋子。而事實上世上瘋子之多﹐出乎想像。人心真如雙臉人一般。或許其真實度乃係喺配角中道出好人心裡嘅惡魔﹐與罪人心裡嘅良善一面。真實世界﹐非似戲中主角﹐歹角永遠大奸大惡﹐英雄始終正義凜然。難怪乎聖經叫我哋要保守我哋嘅心。人心中嘅罪性﹐正如潛伏嘅病毒﹐一旦被激起﹐將蔓延至不可收拾。有時真怕自己喺惡劣嘅環境中﹐唔知會變成一個點樣嘅人。因為我知道自己心中自私嘅一面﹐只因神恩待﹐我仍能以貌似好人自居。希望我能警醒﹐免入迷惑。