大日子

中學放榜後兩日﹐大概大部份學生都已知自己花落誰校。
根據團契導師劉傳道所講﹐放榜前後一個月﹐電台電視台最忌播放嘅歌應該係 Only You。試想像如果有學生科科攞 U﹐重要兜口兜面咁聽到 Only U.... U U U, U U U..... 真係會發癲。
回想當年﹐好多年前﹐怠懶成疾﹐結果喺自己張成績單上表露無遺。未能回本校﹐次等學校又唔想入。因為只差兩分﹐於是四出嘗試其他與母校同等級嘅學校。當時二姐帶住我並同學D一齊揾學校。清晰記得喺的士裡悔恨當初﹐淚眼外望﹐見到兩個搬運工人托住一片超大玻璃艱難舉步﹐心想我寧願做佢哋都唔想做自己。結果入左一間據聞比較像樣嘅私校讀預科。最妙嘅係負責人一見到我張成績表就話: "成績咁好﹐唔洗考慮哪﹐直接填入學表啦。"當真諷刺﹐事關半日前﹐喺自己學校以成績太差被拒﹐只能填後備學位申請。無奈﹐邊個叫自己無用?
最終我只係喺該校讀左一日半。第一日開學禮﹐半日就放學。第二日﹐因為唔清楚原來自己個班係浮動班﹐而上課表又非常混亂﹐我以為只要返自己班房即可。結果第一堂英文就發現唔係自己班﹐但係又唔知自己班喺邊﹐又因當時年紀小﹐怕被老師鬧唔敢出聲。小息後又返自己班房﹐結果又上英文﹐又唔係自己班。落堂後周圍揾又揾唔到。礙於我以前母校校規極嚴﹐上堂時不能隨意走動﹐所以我以為其他學校亦如此 (後來先發現原來有學生上課時私自離開學校範圍亦無人管)﹐於是情急下躲於女廁兩堂。終於到午膳時間﹐亦終於問到自己班午後上課地點。午後課程﹐回自己班房﹐結果又係上英文。終於當日上左七堂英文﹐喺女廁 lei 埋左兩堂。
第三日一早得知被取錄讀室內切雞﹐辦完離校手續﹐從此就無再返去該校哪。可能因為受刺激過度﹐黐左線﹐所以從此讀書好認真。