烏干達 Mission Possible 之 Lhaki 的一天 (上)

本來 Lhaki 想帶我哋去遊覽烏干達嘅風光名勝。但一來路途遙遠﹐二來我同 Joanne 都想體驗一下 Lhaki 喺烏干達嘅生活﹐於是決定其中一日會跟 Lhaki 做佢平日會做嘅事。

於是翌日﹐Achim 上班前到 guesthouse 接我哋去小巴站 (圖一)。亦即 Lhaki 平日會搭去 downtown Kampala 嘅小巴。其實 Kampala 只見一種公共交通工具﹐就係 14 座麵包車。話時話架小巴都認真夠污糟。到達 Downtown﹐Lhaki 帶住我哋穿插於車群與人群中。面對如此驚險鏡頭﹐我如常唔識過馬路﹐只有死命捉住 Lhaki。

第一站﹐先去 Kamapla Pentecostal Church 打點下星期嘅事宜。見見我哋嘅領隊。順便參觀參觀 KPC。剛巧遇上 Watoto Choir 嘅練習 (上次到港嘅係 team 32﹐仍在巡迴表演中。圖二所見係另一隊﹐將於十一月出隊往美國。大家唔好錯過)。於是請佢哋表演一曲。佢哋清唱 "I'm not forgotten﹐" 望住呢一班滿有喜樂嘅孤兒﹐想起佢哋如此整潔﹐可以受教育。心有感觸﹐神真真無忘記佢哋。正如神無忘記我﹐忍唔住淚盈於睫。

從 KPC 出嚟﹐我哋開始如 Lhaki 平日般﹐捱家捱戶探訪當地嘅中國人。烏干達嘅中國人口比我想像中多。佢哋多數幫當地人看鋪﹐亦有自己經營小店鋪嘅。Lhaki 乃地膽﹐雖然中國店員唔係聚於一兩條街﹐而係分佈喺唔同位置﹐但 Lhaki 完全熟知各方位。原來喺過往一年半以嚟﹐Lhaki 一個女子﹐由零開始﹐將佢哋喺各處揾出嚟﹐同佢哋傳福音 ( Lhaki 由唔識講國語講到識)﹐教英文﹐直至現在開辦第一個喺 Kampala 嘅烏干達華人團契。有快樂嘅收成﹐亦有孤獨失望遭拒絕嘅時候。

因為 kampala downtown 有好多路都相當爛﹐相當骯髒﹐空氣混濁﹐塵土飛揚﹐所以四個小時後﹐我同 Joanne 都開始累。但反觀 Lhaki 卻越行越起勁。我同 Joanne 都感慰 Lhaki 嘅信心同熱誠。我同 Joanne 講我其實探訪得好開心﹐只係因為一次半次嘅新奇﹐因為我知道三星期後我就返香港﹐所以絕無所謂。但如果神呼召我好似 Lhaki 咁長期喺如此環境奔走為神作工﹐我想我無法接受。所以我由原本嘅欣賞 Lhaki 變為非常欣賞 Lhaki 。加油!