烏干達Mission Possible 之夜遊杜拜

8月13日。終於出發哪。多謝鄺老板﹐車我同Joanne去機場。多謝 MayMay﹐請我哋食壽司。
到機場﹐最擔心係行李超重。事關由香港飛烏干達﹐寄倉行李不得超過 20kg。而我同 Joanne 嘅行李大部份係帶俾 Lhaki 嘅補給品。結果﹐我哋兩人合共超出 7kg。於是哪哪聲再重整行囊﹐盡量將重物帶身﹐甚至要將其中一件留低﹐俾 MayMay 攞走。一面重整﹐一面默禱可以過關。結果﹐仍超重 2kg﹐幸第二次 check-in 遇著個寬鬆嘅地勤﹐不但無罰我哋錢﹐重主動表示可以加埋已放棄帶嘅物品。鬆一口氣。
阿聯酋嘅飛機真係貴得有道理。可能我坐慣平機﹐唔知原來好多飛機已有獨立電視﹐ 有多台選擇﹐又有得打機。唔記得坐左七個定八個鐘﹐ 已經食左兩餐。重要係好豐富嘅兩餐。連同上機前食嘅壽司﹐喺十小時內食足三餐。
凌晨四點﹐邸杜拜機場。杜拜呀。短時間內發展神速嘅杜拜﹐李籠兒嘅杜拜﹐傳說中嘅杜拜。第一時間去 Duty Free 睇睇 Lhaki 同 Achim 好想食又無得食嘅 Milka 朱古力。三個幾美金一超大排﹐買三送一。買左八排。Joanne 另外再買零口俾當地小朋友。我唔太食朱古力﹐無法印證﹐但根據 Joanne 同 Lhaki 所講﹐杜拜嘅朱古力比香港買嘅新鮮好多﹐好味好多。遊完機場﹐買完 postcard﹐上完網﹐小憩完﹐祈埋禱﹐都夠鐘上機。另外九小時嘅機飛烏干達﹐再食多兩餐。喺睡意惺忪中邸步。