烏干達 Mission Possible 之鄰家小孩

MAF guesthouse 位於一條寧靜嘅小村。雖然 guesthouse 佈置得光潔舒適﹐但一打開大閘﹐就覺得同村內嘅簡陋頗成對比。晚飯前﹐喺村內走走﹐見光住腳丫嘅小朋友四處玩耍。於是 Joanne 每人分一排朱古力。村民非常友善﹐我走到邊大家都會同我打招呼。村內小孩細細個就要幫忙做家務。小孩嘅主要任務係去公眾水喉打水。所以喺烏干達嘅村內會經常見到小朋友攞住兩個電油桶或水桶。 幸而 guesthouse 內有自來水。但自來水只能用嚟沐浴。連漱口都唔可以用自來水﹐要用瓶裝水﹐因為自來水有太多細菌。 聽組員講有位宣教士因為用自來水刷牙﹐舌頭感染細菌發炎﹐醫左好耐。最恐怖係有一種食肉蒼蠅會係我哋洗完掛喺外面嘅衣服上產卵。當人著上有蒼蠅卵嘅衫後﹐蒼蠅卵會移植皮膚﹐最後幼虫會破膚而出。其中一位 MAF 飛行員曾中招。所以所有晒乾嘅衣物都要燙過先可以著﹐因為熱力可以將蒼蠅卵殺死。但對於烏干達嘅人嚟講﹐卻對此見慣不怪﹐無嘜所謂。所以會經常見小朋友爛肉﹐乃因蒼蠅所起。