烏干達 Mission Possible 之 污。乾。撻

懷住興奮嘅心情踏出飛機。時間係當地嘅下午二時多。氣溫 22 度。Entebbe 機場相當簡陋﹐有些許似舊廣州火車站嘅海關大堂。過關時﹐海關員居然話我哋要辦簽證。但我已一再喺香港詢問過﹐特區護照無需簽證。當然我同 Joanne 都無辦簽證。分辯無效﹐於是海關員叫我哋從新排落地簽證嘅隊﹐另付美金 50 元辦證。Joanne 默禱求神作主。結果落地簽證嘅海關員喺收左錢後﹐無哪哪良心發現﹐表示去問問上頭。結果佢決定唔洗我哋辦證﹐還翻錢俾我哋。感謝神。
一踏出機場就見到 Lhaki 同 Achim。本來 Achim 係開小型飛機接我哋﹐但當日佢只飛行半日﹐任務完成已將飛機飛回基地﹐於是改為開車。有少許失望﹐因為實在好想坐 Achim 開嘅小型飛機。
從 Entebbe 往首都 Kampala 大概係大半小時嘅路程。出發前曾喺 youtube 睇過若干有關烏干達嘅短片。當自己置身其中時﹐一切就如短片般﹐所以感覺好似重係睇緊影片一樣﹐似實似虛。
雖然溫度非常適中﹐但非常乾燥﹐而且感覺環境相當污糟。最奇怪嘅係無哪哪會喺路上出現一群牛﹐係鬥牛個種有長角嘅牛。因為路窄﹐牛群擦身而過時會撞落車度。想拍低牛頭相片﹐但太近﹐只拍到牛角。