烏干達 Mission Possible 之 尼羅之旅

終於有時間寫翻我嘅回憶錄。
星期六﹐一早出發往尼羅河。一直以為尼羅河上遊喺埃及﹐原來其實喺烏干達。於是我哋去左 white water Nile 同 Source of Nile。從 Kampala 出發大概兩個小時路程。沿途都係一般常見嘅非洲"市郊民居"﹐即係鋪滿紅土嘅草屋磚屋。
嘩﹐尼羅河呀。寧靜多於壯觀。我哋先去睇激流最激嘅一段。時見翻艇發生﹐好彩我無玩。聽聞之後嘅星期六 (亦即 Watoto global team 去嘅禮拜六) 另一班觀光客中一位男子喺翻艇後失蹤。相當可怕。
喺 睇人玩激流期間有個小插曲。話說有個男子問亞花可唔可以幫佢影相﹐亞花當然義不容辭就伸手想攞佢部機。點知男子將其遞俾另一男子﹐然後企喺亞花隔離﹐都未知發生嘜事就被人影左相。奇奇怪怪咁。算數。點知幾分鐘後﹐又有另一男子要求同亞花影相﹐跟住有三﹐四個男子排住隊要同亞花影。企喺一邊嘅 Lhaki 同 Achim 大笑不已。佢哋係唔係認錯人? 不過我相信根據愛華斯嘅理論﹐係因為亞花膚色似非洲土駐﹐所以容易引起誤會。而根據我二姐嘅駐解﹐係因為佢哋以為自己去左野生動物園﹐快啲同野獸影相先。滴汗。
離開 white water Nile﹐就去到 Source of Nile﹐亦即尼羅河嘅最高點﹐河水由此往下流。咁岩見到一對新人。一定係烏干達嘅有錢人。新娘件婚紗好靚。但亦只有黑人先可以用黑花襯托。移椅﹐咁即係我都得? 嫁得出先算。烏烏烏。。。。。。
之後逛左一陣 Jinja downtown。有一年若五歲嘅小童跟住我哋要錢。五歲本來應該係天真爛漫﹐但佢卻非常老氣橫秋。雖然小朋友講非洲話聽唔明﹐但可以從佢表情上睇出江湖味。對﹐係講緊五歲嘅小朋友。令人痛心。
逛完。襯太陽未落山﹐回程。