烏干達 Mission Possible 之 主日

喺烏干達嘅第一個主日﹐先去 Kampala Pentecostal Church 崇拜。嘩﹐強大嘅詩班﹐燈光音響﹐如果唔係身處黑人堆﹐真係唔覺自己喺非洲。Kampala Pentecostal Church 由加拿大牧師 Gary Skinner 於 1983 年成立 (亦即 Watoto 嘅創辦人)。至今已有會眾 二萬二千人﹐六個聚會點﹐一星期 有17堂崇拜。當日我哋去左母堂 KPC central。除左詩班正外﹐報告時間更係一絕。所有報告以短片形式播出﹐稱為 KPCNN。超 pro。豐收可以考慮由 A ko 操刀﹐整翻個 CCCCNN。不過每主日都整一次﹐真係可花時間。下面係一個 sample﹐Watoto Conference 嘅短片。佢哋連每次教會嘅 workshop 都有短片。

崇拜後即飛奔去參加烏干達華人福音團契﹐亦即 Kampala 第一個華人團契。由香港人 Lhaki Tang 於 2006 年成立。團友唔係好清楚幾多人。當日一嚟就由我同 Joanne 分享。查經後分組禱告時無哪哪有人拍我﹐原來 Joanne 正想用三福同未信嘅朋友分享福音﹐想我幫忙翻譯。事關 Joanne 喺恩福係三福隊同工﹐所以講得非常清晰。而且當時坐低表示想聽嘅朋友們亦非常認真。結果有一位朋友願意相信﹐有兩位想信﹐但想問多啲。另一位早走﹐但都打電話翻轉頭表示想再知多啲。可惜時間關係﹐只有留待 Lhaki 跟進。因為我哋要喺太陽落山前離開市中心。於是又急步往的士總站 (的士其實即係14 座小巴) 進發。

途中見到有啲兩﹐三歲衣衫濫褸嘅小朋友好似洋娃娃咁被人放喺路邊﹐伸出雙手行乞。Lhaki 話喺 Kampala 好常見。就好似喺 Jinja 見到個位江湖小朋友﹐每早被家人放路邊行乞﹐晚上再接回家。但。。。佢哋只係兩﹐三歲嘅年紀。。。就坐一整日﹐根本唔知有無飯食﹐有無水飲﹐有無廁所去。實在見者心酸。更令我願意支持 Watoto 嘅事工。