賭王之約

(為網站安全起見﹐以下內容將會出現 XXX 代號)
不知不覺間﹐已開工一個月﹐但感覺已過左三個月。今個星期﹐因為老細出差﹐差不多每日都可以八點幾九點放工﹐最遲一晚都只係到十點幾﹐頓有重見天日之感。
星期二﹐本來預左又要做到零晨﹐但因為賭王之約﹐又因老闆出差在外﹐老闆娘特赦﹐八點半開完會走人。但同時亦見識何謂有錢人家嘅大牌。
話說諗住要加班﹐於是星期二一身 O.T. look 翻公司。點知早上11:30﹐老闆從北平至電﹐要我下午 1:00 去麗X郵輪集團開會。如果大家知道﹐麗X郵輪集團嘅主席﹐亦即係雲X集團主席。其父係大馬三大富豪。同另外三位可能大家都常聽嘅賭王合稱亞洲四大賭王。其本人因為近年投得獅城某大賭場業務﹐躍升為世界三大賭王﹐其年薪五千七百萬美元﹐為大馬年薪最高嘅執行董事。
於是我望下自己嘅 O.T. look﹐再望下個鐘﹐當機立斷﹐飛的返屋企換衫﹐再飛的去尖沙咀碼頭。全程只係用左55分鐘。同老闆娘﹐project-in-charge 會合後上開會地點﹐1點﹐其他與會人士已到齊。之不過秘書話﹐林先生未到﹐會議改 1:45。於是一眾人先去午膳。1:45 再上去。秘書話﹐林先生到左哪﹐但佢要進餐﹐著我哋先去會議室等。等﹐等﹐等﹐下午 4:00﹐秘書話﹐林先生話重有半個鐘就入嚟哪。結果會議最終喺六點先開得成。不過都興幸林生尚算平易近人。
我喺度為我個啲 claim 唔翻嘅二百幾蚊的士錢肉痛。早知我搭叮叮轉渡海小輪都趕得切有餘。但我肉痛嘅個二百幾蚊的士錢對林生嚟講完全少到無影。世界就係如此。不過當真興幸我有天上財寶。
另外要感恩嘅係會議結朿後﹐老闆娘主動叫我放心﹐佢唔會要我做賭場部份﹐我只要負責酒店部份。事關一面開會﹐我一面唔安樂﹐心想應如何對應﹐如何履清界線。感恩。神已作工。