八達包

嘩﹐勞動節﹐終於可以休息休息。本來話只放一日﹐星期六﹐日要翻工﹐好彩一來公司大廈 weekend進行 pest control﹐二來因為大半間公司同事都病﹐交叉感染﹐老闆良心發現﹐先至唔洗返﹐放足三日。無咁半條人命。媽媽幾次叫我不如辭工。後來講開﹐原來另外幾位同事嘅家人都多次叫佢哋辭職。無奈依家環境艱難﹐辭工再搵﹐並非易事。同前老闆講開公司兩位夫妻檔老細 嘅軼事﹐連前老闆都睇唔過眼﹐話佢哋真係一對活寶。不過講老實話﹐雖然老闆EQ低﹐但至少唔係陰險人物。老闆娘雖然難以捉摸時不時愛發小姐脾氣﹐但佢心情好時都不失人情味。猶其聽完 youtube 個 Alan Ho 投訴港龍短片﹐更覺其實自身並非太難堪。
講開無咁半條人命﹐話說我差不多每朝返工前都會喺地鐵間美心買包做早餐。因為美心位置同入閘位近﹐所以我俾完錢﹐放個包入袋後會揸住個銀包到閘口。有朝因為太累﹐放錯左個銀包入袋﹐然後攞住個包。好彩發現得早﹐如果我傻傻哋用個腸仔包嚟 du, 包瘀死。