三大

澳門組另一位建築設計師昨正式辭職﹐佢做左一年﹐話已經好頂公司唔順。雖然佢重要留多一個月﹐但整個星期﹐佢已實行準時放工計劃﹐晚晚七點﹐七點半就走人﹐唔理我哋一班組員個個日日做到零晨。於是星期五午間﹐同佢好好傾傾﹐無論我如何勸說﹐佢只肯留至八時。雖然我作為其中一位 project in charge﹐ 但論職位﹐我同佢咁高咁大﹐我無權亦無力多作要求。而另一位 project in charge 乃好好先生﹐唔會鎮壓﹐而大老細又唔理﹐於是只有放佢走。突然百上加斤。
加上本週眼見老闆娘如何對待海事博物館組﹐令人反感。話說本來我同另外兩位同事係海事博物館組 (無錯﹐我一人分飾兩角﹐但好彩重頭戲當日唔洗我加入)。因為仍處投標階段﹐某日主辦單位喺地盤有 walk-thru﹐其餘五間公司都會出席。老闆娘著我哋三人準時﹐佢自己會由屋企出發。結果老闆娘大遲到﹐入唔到地盤﹐打電話叫其中一位男同事出去接佢。結果因為保安失蹤﹐兩人都入唔到地盤。於是老闆娘發脾四﹐大罵男同事唔醒目﹐唔 observant﹐由地底鬧到上地面。但係。。。。但係。。。遲到而至兩人入唔到地盤個位好似係老闆娘自己喎。好哪﹐四月三十 日walk-thru ﹐五月七日早上十時死線。老闆娘負責如何做 presentation﹐但一直唔俾指示 project in charge﹐直至五月六日下午先同 project in charge 講做啲嘜。六點幾﹐老闆娘失蹤﹐原來去左行街 (後來知道﹐佢訂左個四萬幾蚊嘅手袋貨到﹐哪哪聲去攞﹐然後行埋街) project in charge 打鑼咁搵佢﹐佢聽電話都無心機﹐事但話點做。結果九點幾翻上公司﹐突然心血來潮要做另外一啲﹐於是之前幾個鐘做嘅野作廢。跟住佢做一陣又走人。零晨三點半﹐終於做完。於是一齊走﹐就喺電梯口﹐老闆娘突然 SMS 到﹐話又想加啲減啲。於時澳門組目送可憐嘅海事博物館組又入返公司。後來聽秘書講﹐老闆娘如此作風﹐佢領教過不下廾次。
有啲灰﹐之前想辭職時深怕其他公司可能更糟﹐誠如上一篇所講﹐老闆老闆娘都有溫情時候。但後來得知原來本公司喺香港大學建築系乃盛傳嘅三大臭名公司。而做得較長嘅同事亦言﹐老闆喺香港建築界以惡出名。甚至有已離職嘅同事話見新工時﹐有見佢喺呢間公司做左一年﹐對佢另眼相開﹐咁都捱到一年﹐愚子可教。甚至連做建材嘅團契弟兄一聽我喺邊間公司做﹐第一個反應喺﹐你老細好惡架喎。做過呢間公司﹐大概也夠我送我來回地獄又折返人間哪。