救命!

又一位建築設計師請辭。我又知道另一位建築助理揾緊工。
星期五﹐內心非常起伏﹐谷住一道氣﹐為同事憤憤不平。
話說 submission 完後﹐澳門組工作量大大減輕。三位同事調去別組﹐留一位繪圖員幫我。所以呢一兩星期我其實頗輕鬆。但卻為被調去同本身喺尖沙嘴組嘅同事們難堪﹐因為佢哋正經歷澳門組經歷過嘅。無盡 OT 加受氣。
令我要叫救命嘅係辭職嘅建築設計師﹐同事J﹐乃尖沙嘴組 project-in-charge。佢雖請辭﹐但依然好為尖沙嘴project負責﹐但勁小氣嘅老細自佢遞辭職信後一整個星期﹐唔采佢﹐唔望佢﹐唔聽佢講野。老細明知佢負責做 rendering﹐但當佢想改個 rendering 時﹐唔直接同亞同事J講﹐但卻當佢面同別個同事講個 rendering 要點改點改﹐完全當佢唔存在。秘書話老細係好小氣﹐呢種事唔係第一次發生。大佬﹐五十幾歲人﹐洗唔洗咁幼稚呀?
不過除卻辭職外﹐大概同事J得罪左老細。話說遞辭職信當天同事J向老細提出意見。因為同事J又係當年海事博物館投標組嘅 project-in-charge。如果大家記得我講過老闆娘遲遲唔講要做嘜﹐兼加鼠出去攞手袋﹐唔做野但多多要求至令各人做到零晨五點。同事J提出 (但無講手袋事件﹐因為喺秘書爆俾我哋知﹐唔想連累秘書)。結果老細居然話老闆娘完全無錯﹐多多要求係佢工作認真﹐遲遲唔俾指示係我哋嘅錯﹐因為我哋唔夠主動唔問佢。同事J所有提嘅意見﹐老闆一蓋推晒責任喺我哋身上。 雖早知老細從來唔認錯。但聽到依然覺得心寒。
星期五令我谷氣嘅一幕亦然。因為公司電腦慢﹐做 computer model 常 hang 機。兩位尖沙嘴組做 computer model 同事有一日一齊 hang 機﹐俾老細聽到﹐老細同 CAD manager 講呢個時候唔 hang 得機架我唔要再聽到 hang 機兩個字。點知星期五﹐其中一位 computer model 同事失口叫哎 hang 機。點知亞老細走出嚟鬧 CAD manager 話﹐"我講過話唔準再 hang 機﹐點解重 hang 機? I'm serious." 白癡。關 CAD manager 嘜事呀? 唔要 hang 機就俾多啲錢買快啲嘅機。然後又發脾氣大力 slam 門。
好﹐話說老細本來星期三約左人打 golf 唔翻工﹐後來又決定唔去打golf 翻公司睇尖嘴組進度。然後猛講佢為尖嘴組犧牲好大。噢﹐平日翻工時間唔打 golf 好大犧牲﹐我哋禮拜六日都要翻工就無犧牲。犧牲! 秘書睇唔過眼﹐爆俾我哋知老細 charge 澳門組個客三百幾萬 additional fee﹐其中大部份係 OT 費﹐老細袋袋平安。秘書提出要補賞澳門組。老細夠膽死話請我哋食餐飯就算。秘書話會幫我哋力爭﹐但成數不高。
揾緊工嘅建築助理講笑話佢會喺辭職信寫因為佢永遠永遠都達唔到老闆老闆娘要求﹐引疚辭職。我睇我就快都會寫同樣嘅信哪。等唔等到八月? 秘書話如果老細真係肯分翻份俾澳門組﹐點都要等到個時﹐因為係我哋應得嘅。但我怕當下個月governmental submission 有結果﹐開始 tender submission 時﹐我無命等見分花紅。