代篤檸檬

上星期五至本週二﹐老闆老闆娘雙雙遊日本﹐我哋處於無政府狀態﹐快樂似神仙。工作無變﹐工作地點環境無變﹐OT依舊 (當然早少少鬆人)﹐ 原來只要兩位唔喺度﹐直有天壤之別。至少無左老闆嘅鬧人聲同老闆娘出嘅無理 action list(老闆娘經常以為一按制啲圖會識自動畫完﹐成日出啲 3日工作量嘅 action list 要 2日做完﹐然後成日喺你身邊問"做完未呀﹐做完未呀﹐咁耐嘅")。猶其一眾同事都係玩得之人﹐更令三日快樂不知時日過。做下野﹐吹下水﹐上下網﹐走到無雷公咁遠食晏﹐又一日。
有日﹐我哋去左九記對面嘅大排檔食蕃茄公仔麵﹐發現以上攪笑聲明。我叫左蕃茄腸仔﹐火腿﹐餐肉公仔麵。點知嚟度﹐無餐肉﹐但多左隻蛋。同事叫嘅蕃茄腸仔蛋公仔麵﹐無左隻蛋﹐多左片餐肉。岩岩好﹐原來嚟到要自己 mix and match。不過味道不俗﹐但可惜當日熱到噴火﹐重要坐大排檔。一路食﹐一路流汗。但依然有好多上班族去食。
三日無壓力日子過後﹐又要回到現實哪。好彩三日輕鬆之餘﹐我都做左好多野。其實無壓力工作效率可以更高。