見鬼之真相大白?

兩星期前嘅星期四﹐如常喺公司OT﹐如常人有三急﹐如常路過後樓梯去公司嘅唯一廁格。但有啲野唔太如常。當我喺開廁所門嘅一刻﹐眼角從後樓梯門嘅玻璃窗瞄到門內企左個身穿青綠色衫嘅"人"﹐呆呆滯滯企喺門邊。我立時一涼﹐唔敢再望﹐匆匆完成我要做嘅野﹐然後急急腳走翻入公司。躊躇著應否告之同事﹐又怕會嚇嚫大家。最後當負責買飯嘅男同事返到公司﹐我叫佢陪我再去後樓梯睇睇。其他同事聽見﹐一呼百應。但一無所獲。後樓梯水靜鵝飛。當我以唔同角度重演我走過時眼角會瞄到嘅野﹐怕係自己眼花﹐因為只係眼角瞄到﹐無直視﹐可能將燈光或其他物件當係"人"。但幾次重演﹐一如平常眼角見慣﹐除灰色樓梯外﹐空空如也。所見肯定同剛才有別。肯定剛才有某綠色物體喺門邊出現。大家覺得一係我眼花﹐一係剛好有個人企喺門邊。因為7樓只有我哋公司﹐所以可能係6樓或8樓嘅人﹐食煙好﹐唔知做嘜好﹐反正咁岩走左嚟7樓企左喺度。又或更有可能係大廈管理或維修人員。但大家認為最有可能只係我太累﹐眼花。接住落嚟嘅兩小時﹐大家不斷現身說法或講朋友親身經歷嘅靈異之事。身為 zi do to﹐明知就算所言非虛﹐也必定係魔鬼所為﹐而非傳統中式﹐西式惡鬼﹐但也免不了膽怯。猶其星期五如廁﹐完全唔敢往後樓梯望。星期五全公司都知昨晚嘅事﹐但大家只當笑話﹐只當我眼花。我亦希望如是。
直到今個星期四晚﹐又係OT時份﹐當唔太知發生過嘜事嘅新同事稱被後樓梯著青綠色衫嘅人嚇嚫﹐大家先開始微微恐慌。但真相大白﹐事緣綠衣人推門而出﹐見嚇嚫我同事﹐同佢講左句 hello 然後入翻後樓梯 (奇怪﹐嚇嚫人唔講 sorry, 講 hello???) 無論如何﹐真相大白﹐原來真係人﹐當真係大廈管理或維修人員。之不過後來同事多口問 front desk, 該大廈有無綠衣制服﹐front desk 話只有黃衣同啡衣﹐無綠衣時﹐真相又開始膜糊。到底該位綠衣人﹐何許人也?